265 mjete klasike pushtuan Tiranën në datat 13-16 Maj!

265 makina klasike nga Belgjika zbarkuan në Tiranë përgjatë datave 13-16 Maj në Sheshin “Italia” për ta kthyer atë një prej vendtakimeve kryesore të apasionuarve dhe nostalgjikëve të "mjeteve me shpirt".

Nën filozofinë e përjetimit të një udhëtimi të paharrueshëm në timonin e makinës me një atmosferë të këndshme dhe miqësore, Tour Amical zhvilloi edicionin e 19-të tijin me destinacion Sofje – Prishtinë – Shkup – Tiranë – Budva – Dubrovnik.

Edicioni i 19-të i Tour Amical zbuloi perlat e panjohura të Ballkanit. Ata u shprehën se rrugët e mrekullueshme përmes Bullgarisë, Kosovës, Maqedonisë së Veriut, Shqipërisë, Malit të Zi dhe Kroacisë lidhin qytete historike, si dhe destinacione të reja. Vendet e Ballkanit ofrojnë një gamë të gjerë peizazhesh të larmishme dhe rrugë spektakolare. Këto vende shfaqin trashëgiminë e një të kaluare të pasur dhe plot ngjarje, por janë gjithashtu në rritje në turizëm.

Tour Amical e cilësoi Tiranën si një qytet po aq të këndshëm sa Berlini, rrënojat dhe historitë po aq magjepsëse sa ato të Romës, kafenetë dhe baret, komode si në Amsterdam dhe çmimet, edhe më të favorshme se Krakovi. Për ta Tirana është xhekpoti!

Ata gjithashtu u shprehën se Shqipëria është një vend në zhvillim, e cila vihet re mjaft mirë në Tiranë, çka na jep idenë se çfarë na pret më tej në Shqipëri. Një përzierje e pasur kulture dhe modernizimi me shije të cilat krijojnë një atmosferë të këndshme.

Të gjithë retroistat shijuan koleksionin e mjeteve klasike të Tour Amical dhe shkëmbyen eksperiencat e përbashkëta si komunitet.